Est 9 | MEU | STEP | Hua ihagwauta-ruana, ladana Adara, dinana ihagwauta-toina ai, hanua pavapavana ena haheḡani bona ena revareva anidia bae vara negana vada e kau. Una dina ai Iuda taudia inaidia ese bae hadareredia eto, ḡau tamona Iuda taudia ese inaidia e hadareredia una dina lalonai.

Esther 9

Iuda taudia na e kwalimu

1 Hua ihagwauta-ruana, ladana Adara, dinana ihagwauta-toina ai, hanua pavapavana ena haheḡani bona ena revareva anidia bae vara negana vada e kau. Una dina ai Iuda taudia inaidia ese bae hadareredia eto, ḡau tamona Iuda taudia ese inaidia e hadareredia una dina lalonai. 2 King Ahasuero ena basileia lalodiai Iuda taudia na edia hanua lalodiai e hebou, una dina ai, ihadikadia dalana e tahuava taudia na bae dabaidia tao totona. A asi tauna ta ese baine laodia ahu diba, badina be taunimanima iboudiai ese idia garidia e gariva. 3 Bona basileia lohiadia bona heitatao taudia bona hekwara taudia bona hanua pavapavana ena hesiai taudia iboudiai ese Iuda taudia e durudia, badina be Morodekai garina e gariva. 4 Badina be Morodekai na bada herea hanua pavapavana ena ruma ai, bona harina vada e piua, basileia heḡeḡemadai iboudiai lalodiai; badina be una tau Morodekai ena siahu e bada e laova.

5 Taunabunai, Iuda taudia ese inaidia iboudiai na dare amo e aladia; e aladia mase bona e habuadia tari, bona e inai henidia taudia na edia ura heḡereḡerena ai e kara henidia. 6 Hanua badana Susa ai Iuda taudia ese tatau sinahu-ima e aladia mase bona e habuadia tari. 7 E aladia taudia haida ladadia be Parasanadata bona Dalafono bona Aspata, 8 bona Porata bona Adalia bona Aridata, 9 bona Paramasta bona Arisai bona Aridai bona Vaisata; 10 ini na Hamana Hamedata, Iuda taudia inaidia, natuna mamaruanedia gwautaosi.

11 Una dina ai haida ese hanua pavapavana e hadibaia, hanua badana Susa ai taunimanima edehohodia vada e aladia mase. 12 Bena hanua pavapavana ese Queen Eseta e hamaoroa, eto, Hanua badana Susa lalonai Iuda taudia ese tatau sinahu-ima vada e aladia mase, bona Hamana natuna mamaruanedia gwautaosi danu. Hanua pavapavana ena basileia oredia ai be edehohona vada e aladia mase! Harihari emu noinoi be dahaka? Vada baina henimu. Dahaka ma o uramu? Baine hekara ḡuḡuru. 13 Bena Eseta eto, Hanua pavapavana lalomu bema heḡereḡere, Iuda taudia Susa ai na hari dina haheḡanina heḡereḡerena ai kerukeru ma bae karaia; bona Hamana natuna mamaruanedia gwautaosi tau-dae auna ai bae taudia dae. 14 Taunabunai, hanua pavapavana na e haheḡani, unu bae karadia toma; haheḡani na Susa ai e gwauraia hedinarai, bona Hamana natuna mamaruanedia gwautaosi na e taudia dae. 15 Bena Iuda taudia Susa ai na hua ladana Adara dinana ihagwauta-hanina ai ma e hebou, Susa ai tatau sinahu-toi ma e aladia mase; a kohu asie dadi.

Purimi Ariana

16 Iuda taudia oredia hanua pavapavana ena basileia lalodiai e nohova danu e hebou, edia mauri igimana totona; bena inaidia imadia amo e roho mauri, bona e inai henidia taudia gerebu-hitu daha-ima ^{▼▼Gerebu-hitu daha-ima = 75,000.} na e aladia mase; a kohu na asie dadi. 17 Una na hua ladana Adara dinana ihagwauta-toina ai; bena dina ihagwauta-hanina ai idia na lagadia e ani, aria bona moale dinana ai e halaoa. 18 A Iuda taudia Susa ai na dina ihagwauta-toina ai bona dina ihag vauta-hanina ai e hebou, bena dina ihagwauta-imana ai lagadia e ani, aria bona moale dinana ai e halaoa. 19 Taunabunai, Iuda taudia hanua hanua lalodiai, hanua asi maḡudia ai e nohova taudia, ese hua ladana Adara dinana ihagwauta-hanina na moale bona aria bona kone-noho dinana ai e halaoamu, bona una dina ai idia na aniani namo-hereadia e herahialai hehenimu.

20 Bena Morodekai ese ini ḡau iboudiai sivaraidia e tore, bona revareva e tore, Iuda taudia iboudiai ediai e siaidia, King Ahasuero ena basileia iboudiai lalodiai, gabu kahikahidia bona daudaudia. 21 E haḡanidia, eto hua ladana Adara dinana ihagwauta-hanina bona ihagwauta-imana ai, laḡani ta ta lalodiai, na bae badinadia, 22 Iuda taudia na inaidia imadia amo e roho mauri dinadia, bona edia lalo-hisihisi na moale ai bona edia taitai na laḡa-ani ai e hahelao huana; unu dina na aria bona moale dinadia ai bae halaodia; bona unu dina ai idia na aniani namo-hereadia bae herahialai heheni, bona ogogami taudia bae harihari henidia.

23 Bena Iuda taudia na e gwau hamata, sibodia vada e matamaia bona Morodekai ese vada e tore henidia heḡereḡerena ai bae karaia. 24 Badina be Hamana Hamedata, tau Aga, Iuda taudia iboudiai adia inai tauna, ese Iuda taudia ihabua-taridia dalana e lalo-hadailaia, bona mari karana ta ladana Puru e karaia, idia ihadareredia bona ihabua-taridia totona. 25 A Eseta na hanua pavapavana vairanai e gini negana ai, hanua pavapavana ese hahedua revarevana e torea, unu amo Hamana ena lalo-hadai dikana na ia sibona kwarana ai e kau, bona ia bona natuna mamaruanedia na tau-dae auna ai e taudia dae.

26 Taunabunai, unu dina ladadia e hato Purimi, hari hereva Puru dainai. Bena ina revareva ai e hetore herevadia bona ina kara ai vada e ita ḡaudia bona ediai vada e vara ḡaudia daidiai, 27 Iuda taudia na e haheḡani bona e gwau hamata, idia sibodia bagudiai bona garadia- bona edia orea ai bae vareai taudia bagudiai, eto unu dina ruaosi be basie readia a bae badinadia, vada e tore herevadia heḡereḡeredia, laḡani ta ta amo vada e gwauraia negana ai; 28 bona unu dina na bae lalodia tao bona bae badinadia uru iboudiai lalodiai, iduhu iboudiai bona basileia iboudiai bona hanua iboudiai lalodiai. Unu amo hari Purimi dinadia ibadinadia karadia basie boio, Iuda taudia bogaragidiai, bona garadia bogaragidiai danu unu dina ilalolaidia na basine doko.

29 Bena Queen Eseta, Abihaili natuna, bona Morodekai, tau Iuda, ese revareva iharuana ma e torea, mai siahudia ida, hari Purumi herevana ihamomokanina. 30 Revareva na vada e siaidia lao, Iuda taudia iboudiai ediai, King Ahasuero ena basileia sinahu-ta ruahui-hitu lalodiai; maino herevadia bona hereva momokanidia ai e hetore, eto 31 unu Purimi dinadia na bae badinadia, negadia korikori ai, Morodekai, tau Iuda, bona Queen Eseta ese Iuda taudia vada e haḡanidia, bona idia sibodia ese idia bagudiai bona garadia bagudiai vada e gwau hamata, heḡereḡerena, bona edia anivaga bona edia taitai negadia danu. 32 Queen Eseta ena haheḡani ese ini kara e haginidia, bona revareva ese e hamomokanidia.